पाल्पा,फाल्गुन ०९ ।
सुनिल कार्की \
बरिष्ठ मुटुरोग बिशेषज्ञ डा.भगवान कोइराला लगायतको टोली स्वास्थ्य शिविरका लागि पाल्पाको बराङ्दी आउँने कार्यक्रम तय भएको छ । यही फागुन ११ र १२ गते दुई दिने बृहत निःशुल्क स्वास्थ्य शिविर हुने र शिविरमा डा. कोइराला सहितको टोली आउने भएको हो ।
रिडी राम्दी समाज काठमाडौको आयोजना र बगनासकाली बहुउद्देश्यीय सहकारी संस्था बराङ्दीको सह–आयोजनामा दुई दिने बृहत निःशुल्क स्वास्थ्य शिविर बगनासकाली ८ बराङ्दीको बगनासकाली बहुउद्देश्यीय सहकारी संस्थाको प्रांगणमा हुने सहकारीका अध्यक्ष कृष्ण भुसालले जानकारी दिनुभयो । बढ्दो स्वास्थ्य समस्यालाई मध्य नजर गदै स्वास्थ्य शिविरको आयोजना गरिएको अध्यक्ष भुषालले बताउनुभयो ।
शिविरमा स्वास्थ्य परीक्षण गर्न आउने सम्पूर्णलाई निःशुल्क स्वास्थ्य परिक्षण तथा आवश्यक भएमा निशुल्क औषधी उपलब्ध गराइने छ । शिविरमा बरिष्ठ मुटुरोग विशेषज्ञ प्रा.डा भगवान कोइराला, स्त्रीरोग विशेषज्ञ राजेन्द्र बश्याल, आँखारोग विशेषज्ञ तथा बाल रोग विशेषज्ञ सहित वरिष्ठ चिकित्सकहरुद्धारा स्वास्थ्य परीक्षण गरिने सहकारीका सचिव कमलराज तिमिल्सिनाले बताउनुभयो ।