पाल्पा, पुष ६ ।
सुनिल कार्की \
पछिल्लो समय लोप हुँर्दै गएको नेवारी कला संस्कृति र खानाका परिकारको संरक्षण गर्न पाल्पामा योमरी महोत्सव हुने भएको छ । योमरी पुर्णिमाको अवसरमा पाल्पा सदरमुकाम तानसेको टक्सारमा भोली शनिबार योमरी महोत्सव हुन लागेको हो ।
नेवारी परिकार, भेषभुषा, कला संस्कृती र परम्परा हराउँदै गएको अवस्थामा पचिहान जोगाउँदै इतिहासबारे युवापुस्तामा जानकारी गराउन योमरी महोत्सव गर्न लागिएको मैत्री क्लव टक्सारले जनाएको छ । नेवारी भाषामा यो भनेको मनपर्ने र मरी भनेको रोटी भएकोले नेवारीमा सबैभन्दा मनपर्ने रोटीको रुपमा योमरीलाई लिने गरिन्छ । खासगरी नेवारी समुदायमा नयाँ धान भित्राएपछी घरमा भकारी बनाएर राख्ने मंसिर पुर्णिमाको दिन सोही नयाँ धानको रोटी बनाएर परिवार, आफन्त, इष्टमित्रलाई बाड्ने परम्परा रहेको पाईन्छ । योमरी पुर्णिमाको दिन घर घरमा नाचगान गर्दै योमरी माग्ने चलन विगतका वर्षहरुमा भएपनि अहिले भने यस्तो परम्परा लोप भएको छ ।
काठमाडौं र भक्तपुरबाट बसाईसराई गरेर पाल्पा पुगेका नेवारी समुदायका बुढापाकाले चलन चल्ती, संस्कार, परम्पराहरुलाई जोगाउन योमरी महोत्सव गर्न लागिएको कार्यक्रमका प्रचार संयोजक रिलरमान महर्जनले जानकारी दिनुभयो । महोत्सवमा नेवारी संस्कृति सहित नृत्य तथा कला प्रदर्शन, नेवारी खानाको परिकार र योमरीको स्टल प्रदर्शन गरिनेछ ।