पाल्पा,कात्तिक ३० ।
सुनिल कार्की ।
पाल्पाको रैनादेवी छहरा गाउँपालिकाले इभि सवारी दुर्घटनामा ज्यान गुमाएका तीन जनाका परिवारलाई राहतस्वरूप जनही २५ हजार रुपैयाँ प्रदान गरेको छ ।
गाउँपालिकाका अध्यक्ष रुक्मागत भट्टराई स्वयं पीडित परिवारको घरमै पुगेर राहत रकम हस्तान्तरण गर्नुभयो । उहाँसँगै वडा नं ४ का अध्यक्ष गोविन्द बहादुर रायमाझी, जनप्रतिनिधि, कर्मचारी तथा स्थानीयबासीहरू पनि उपस्थित थिए ।
अध्यक्ष भट्टराईले घटनाप्रति गहिरो दुःख व्यक्त गर्दै दुर्घटनाले सम्रग रैनादेवी छहरालाई क्षति पुगेको बताउनुभयो । गाउँपालिकाले राहत वितरणसँगै मृतकहरूको आत्माको चिरशान्तिका लागि श्रद्धाञ्जलि अर्पण गर्दै शोकसन्तप्त परिवारप्रति हार्दिक समवेदना व्यक्त गरेको छ । राहत वितरणको क्रममा अध्यक्ष भट्टराईले स्थानीय सरकार नागरिकका समस्या, पीडा र आवश्यकतामा सधैं अग्रपंक्तिमा रहनुपर्नेमा जोड दिनुभयो । कात्तिक १२ गते रैनादेवी छहरा गाउँपालिकाको वडा नं ४ स्थित छहरा–मेहलढाप सडक खण्डमा इभी सवारी दुर्घटना हुँदा तीन जनाको घटनास्थलमै मृत्यु भएको थियो ।
गाउँपालिकाले आगामी बजेटमा उक्त सडक खण्डको मर्मत र स्तरोन्नतिका लागि छुट्टै योजना अघि सार्ने तयारी समेत थालेको छ । साथै, गाउँपालिकाले सवारी सुरक्षासम्बन्धी जनचेतना अभियान सञ्चालन गर्ने निर्णय पनि गरेको छ ।
