विजयकुमार बौडेल ।
दाङ । लुम्बिनी प्रदेशका स्वास्थ्यमन्त्री खेम बहादुर सारुले राप्ती प्रादेशिक अस्पताल, दाङको छड्के अनुगमन गरेका छन् । सेवाग्राहीको विभिन्न सेवाका बारेमा गुनासो बढ्न थालेपछीस्वास्थ्यमन्त्री सारुले आकस्मिक छड्के अनुगमन गरेका हुन् ।
बिहान १० बज्नुभन्दा पहिले नै स्वास्थ्यमन्त्री सारु सहित प्रदेश सचिव दुर्गालक्ष्मी श्रेष्ठ, स्वास्थ्य निर्देशनालयका निर्देशक रोशनलाल चौधरीको टोलीले राप्ती प्रादेशिक अस्पतालको आकस्मिक अनुगमन गरेको हो । अनुगमन पश्चात मन्त्री सारुले टिकट, लाईन व्यवस्थापन, टिकट काउण्टर, टोकन सिस्टम, महिला, ज्येष्ठ नागरिक, अपांग र अशक्तहरुलाई सहुलियत, ड्यूटी तालिकालगाएतका विषयमा समस्या रहेको बताए ।
मन्त्री सारुले समयमा डाक्टर नआउने, अधिकांश कर्मचारीहरुले सरकारी पोशाक नलगाएका, कुनै कोठामा बत्ति समेत नभएको लगाएतका विषयमा सुधार गर्न निर्देशन दिए । मन्त्री सारुले सुरुमा आफै सेवाग्राही बनेर सेवा प्रदानबारे अनुगमन गरेका थिए ।११÷१२ बजेसम्म डाक्टरहरु अस्पतालमा नआउने गुनासो सेवाग्राहीको थियो ।छात्रवृत्रि करारका केही डाक्टरहरु मात्र अस्पतालमा समयमा आउने तर धेरैजसो स्थाई डाक्टरहरु समयमा नआउने, चाँडै जाने, सरकारी अस्पतालमा भन्दा व्यक्तिगत अस्पतालमा समय दिने सेवाग्राहीको गुनासो थियो ।
बिरामीहरु संग अस्पतालको सेवा प्रवाह र चिकित्सक तथा स्वास्थ्यकर्मीहरुले गर्ने व्यवहार बुझ्दै मन्त्री सारुले बिरामी संग राम्रो व्यवहार गर्न कर्मचारीहरुलाई निर्देशन दिनुभयो । “बिरामीको सुविधाका लागि काउण्टर विस्तार तथा भिड व्यवस्थापन गर्न योजना बनाएर कार्यान्वयन गर्नुस् ।” मन्त्री सारुले भने । “हरेक दिन बिहान कर्मचारीहरुले कन्फ्रेन्स गरेर मात्र सेवा सुचारु गर्नुस्, त्यसको समीक्षा गर्नुस् र कार्यालय प्रमुखलाई जानकारी दिनुस् ।” मन्त्री सारुले स्वास्थ्य मन्त्रालयको स्विकृति लिएर मात्र सरकारी अस्पताल भन्दा बाहिर अभ्यास गर्ने विषय कडाईका साथ लागु गर्न अस्पताल प्रमुखलाई निर्देशन दिए ।
लुम्बिनी प्रदेश स्वास्थ्य मन्त्रालयका प्रदेश सचिव दुर्गालक्ष्मी श्रेष्ठले पुर्ण रुपमा ईहाजिरि लागु गर्नुपर्ने, ड्रेस कोडको पालना गर्नुपर्ने, कर्मचारीको उपस्थिति समय, डाक्टरहरु पुरा समय अस्पतालमा बस्नुपर्ने, फार्मेसीमा अभाव भएका औषधीको परिपुर्तीगर्नुपर्ने लगाएतका विषयमा अस्पताल प्रशासनको ध्यानाकर्षण गराईन् । उनले डाक्टरहरुलाई अस्पतालमा पुरा समय विताउन र बिरामीलाई सेवा दिन निर्देशन दिईन् ।
अस्पतालका मेसु पदमराज अधिकारीले सिमित श्रोत र साधनका बीच अस्पतालको व्यवस्थापन राम्रो गर्ने प्रयास गरिरहेको बताए । उनले प्राप्त सुझावहरु ईमान्दारिताका साथ पालना गर्ने भन्दै मन्त्री स्तरको अनुगमनले काम गर्ने हौसला मिलेको बताए ।
