काठमाडौँ,साउन २३ ।
आज दिउँसो नुवाकोटको शिवपुरी ७ सूर्यचौरमा भएको एयर डाइनेष्टीको नाइन एन एजेडी हेलिकप्टर दुर्घटनामा ४ जना चिनियाँ पर्यटकको ज्यान गएको छ । हेलिकप्टर उडाएका क्याप्टेन अरुण मल्ल भने घाइते हुनुभएको छ ।
उहाँको अवस्था गम्भीर रहेको नुवकोटका प्रहरी प्रमुख शान्तिराज कोइरालाले जानकारी दिनुभयो । दुर्घटनामा चिनियाँ पर्यटकहरु जुदाङ टाङ पुरुष, जी लि- पुरुष, यियाद वु –महिला र जेमिङ सी -पुरुष रहेका नुवाकोट प्रहरीले जनाएको छ । दुर्घटना स्थलमा पुग्नु भएका नुवाकोट जिल्लाका प्रहरी प्रमुख शान्तिराज कोइरालाका अनुसार यत्रतत्र छरिएको अवस्थामा चिनियाँ पर्यटकको शव फेला परेको बताउनुभयो । हेलिकप्टर समेत क्षेतविक्षत अवस्थामा रहेको उहाँले जानकारी दिनुभयो । अहिले चिनियाँ पर्यटकको शवलाई काठमाण्डौं लगिएको छ ।
हेलिकप्टरमा चिनियाँ पर्यटक सहित ५ जना सवार रहेको जनाइएको छ । अहिले घटनास्थलमा चार वटै सुरक्षा निकाय सहित स्थानियले हेलिकप्टरमा लागेको आगो नियन्त्रणको प्रयास जारी राखेका छन ।
