पाल्पा,साउन २२ ।
सुनिल कार्की ।
पाल्पाको रैनादेवी छहरा गाउँपालिकाले पालिकाको ८ वटै वडामा एकिकृत घुम्ती शिविर सञ्चालन गरेपछि नागरिकले घरदैलोमै एकिकृत सेवा पाएका छन ।
बर्खाको समयमा वडा, स्वास्थ्य चौकि देखि पालिकासम्म पुगेर सेवा लिन बाध्य सेवाग्राहीले आफ्नो गाउँ ठाउँमै विविध सेवा पाएपछि स्थानिय खुशी बनेका छन । गाउँपालिकाले पालिका भित्रका नगारिकलाई वडाको टोलटोलमा पुगेर अपाङ्गगता परिपत्र नविकरण र दर्ता, दिर्घरोगीको स्वास्थ्य परिक्षण तथा औषधी वितरण, गरिब परिचय पत्र वितरण, ब्यवसाय दर्ता तथा नविकरण सेवा प्रदान गरिएको गाउँपालिका अध्यक्ष रुक्मांगत भट्टराईले जानकारी दिनुभयो ।
यसरी गाउँठाउँमै सुविधा प्रदान गर्दा अशक्त र वृद्धवृद्धालाई निकै सजिलो हुनुका साथै घण्टौं हिडेर वा सवारी साधनको भाडामा लाग्ने खर्च जोगिएको गाउँपालिका अध्यक्ष भट्टराईले बताउनुभयो । एकिकृत घुम्ती शिविरबाट गाउँपालिकाको ८ वटै वडाका करिब १५ सय भन्दा बढी घरधुरीले सेवा लिएका छन । बर्खायामको तीन महिना यस पालिकाको वडा नं ७ को बल्ढेङ्गगेढी, वडा नं ६ को जुठापौवा र वडा नं ८ को सत्यवतीका हजारौं सेवाग्राही पालिकाको सामान्य सेवा लिन पनि रुपन्देहीको बुटवल झरेर मात्र पालिकाको केन्द्र जानुपर्ने बाध्यता छ ।
यो बाध्यतालाई केही हदसम्म भए पनि कम गर्न शिविरले राहत पुग्ने अपेक्षा पालिकाले लिएको गाउँपालिकाका लेखा अधिकृत लिलामणी बस्यालले जानकारी दिनुभयो ।
