पाल्पा,चैत्र २७ ।
सुनिल कार्की ।
पुष्पलाल स्मृति प्रतिष्ठान नेपालको तेस्रो साधारणसभा आज तानसेनमा सम्पन्न भएको छ । साधारणसभाको उदघाटन जिल्ला समन्वय समिति पाल्पाका प्रमुख टंकनाथ खनालले गर्नुभयो । सो अवसरमा उहाँले पुष्पलाल र विपिको विचारलाई अघि बढाउन तानसेन नगरपालिकाले सहयोग गरेर महत्वपूर्ण व्यक्तिका विचारलाई सम्मान गरेको बताउनुभयो ।
कार्यक्रममा नगरपालिकाका पूर्व प्रमुख अशोककुमार शाहीले बौद्धिक छलफलका लागि यसको स्थापना गरिएको बताउनुभयो । विपी र पुष्पलालको विचारलाई अझ तल्लो तहसम्म लैजानुपर्नेमा उहाँले जोड दिनुभयो । कार्यक्रममा संस्थागत प्रतिवेदन संस्थाका सचिव गणेश ज्ञवाली र कोषाध्यक्ष झपेन्द्र गहिरेले लेखा प्रतिवेदन प्रस्तुत गर्नुभएको थियो ।
कार्यक्रममा जिल्ला समन्वय समितिका समन्वय अधिकारी जनार्दन अधिकारी, पत्रकार महासंघ पाल्पाका अध्यक्ष रेखीराम राना र बरिष्ठ पत्रकार मेघराज शर्मालगायतले शुभकामना दिनुभयो । साधारणसभामा प्रतिष्ठानका अध्यक्ष गोविन्द भट्टराईले आगामी कार्ययोजना तथा समसामयिक प्रस्ताव प्रस्तुत गर्नुभएको थियो ।
साधारणसभामा प्रस्तुत प्रतिवेदन तथा प्रस्ताव सर्वसम्मत पारित भएको छ । साधारणसभा संस्थाका अध्यक्ष गोविन्द भट्टराईको अध्यक्षता, उपाध्यक्ष गोपाल प्रसाद बस्यालको स्वागत र सदस्य सन्तोष खनालको संचालनमा सम्पन्न भएको थियो ।
