पाल्पा ।
पाल्पा सदरमुकाम तानसेन नजिकै घडेरी खन्नेक्रमा ठूलो संख्यामा तोपका गोला फेला परेका छन । जिल्लाको तानसेन नगरपालिका–४ गोलाखाना भन्ने ठाउँमा घडेरी खन्ने क्रममा तोपका गोला फेला परेका जिल्ला प्रहरी कार्यालय पाल्पाका प्रहरी नायब उपरीक्षक वीरेन्द्र थापाले जानकारी दिनुभयो ।
बाइसे\चौबिसे राज्य एकिकरणको समयताका सो स्थानमा गोलखान रहेका कारण तोपका गोला फेला परेको पाल्पा इतिहासका जानकार निर्मल श्रेष्ठले बताउनुभयो । अहिलेसम्म ३०० वटा गोला फेला परेको र उत्खन्नको क्रममा अझ धेरै भेटिन सक्ने श्रेष्ठको भनाई छ ।
गोला भेटिएको जग्गा पाल्पा स्थित नेपाली सेनाको हो । सोही ठाउँमा सेनाले गेस्टहाउस निर्माणका लागि घडेरी खनिरहेको छ । अहिले ती गोलाको सुरक्षित ब्यवस्थापनको लागि पाल्पा स्थित नेपाली सेनाको दि फेमस महेन्द्र दल गणको टोली परिचालन भएको प्रमुख जिल्ला अधिकारी जगन्नाथ पन्तले जानकारी दिनुभयो ।
फेला परेका गोलाको बारेमा थप अनुशन्धान प्रक्रिया अगाडी बढेको पाल्पा प्रहरीले जनाएको छ ।
