पाल्पा,१७ भदौ ।
कालीगण्डकी करिडोर अन्तर्गत पाल्पाको रामपुर नगरपालिका १० मा आज बिहान स्कुटर दुर्घटना हुँदा एक जनाको मृत्यु भएको छ ।
मृत्यु हुनेमा रामपुर नगरपालिका १० गेझा बस्ने ४० वर्षीय यम बहादुर खरु मगर रहेको जिल्ला प्रहरी कार्यालय पाल्पाका प्रहरी नायव उपरीक्षक सुगन्ध श्रेष्ठले जानकारी दिनुभयो । कालीगण्डकी करिडोर पक्की सडक खण्डमा बर्दलेबाट रामटारतर्फ जाँदै गरेको लु ४४ प २४३१ नम्बरको स्कुटर आफै अनियन्त्रित भई दुर्घटना भएको हो । सडक किनारमा रहेको डिभाईडरको पोलमा ठोकिदा स्कुटर चालक मगर घाइते हुनुभएको थियो । उहाँलाई उपचारको लागि रामपुर अस्पताल पठाएकोमा डाक्टरले चेकजाँच गर्दा मृत घोषणा गरेको प्रहरीको भनाई छ ।
प्रहरीले घटनाको सम्बन्धमा आवश्यक अनुसन्धान गरिरहेको जनाएको छ ।
