पाल्पा, माघ ३० ।
सुनिल कार्की ।
गाउँपालिकाको सेवा प्रवाह, विकास र सुशानका गतिविधिको समिक्षा गर्दै बगनासकालीको सार्वजनिक सुनुवाई सम्पन्न भएको छ । बगनासकाली पत्रकार समूहको सहजीकरणमा सार्वजनिक सुनवाई भएको हो । कार्यक्रममा बगनासकाली गाउँपालिका अध्यक्ष सरस्वती चिदीले आर्थिक पारदर्शीता, सुशासन सहितको सेवा प्रवाहमा जोड दिइएको दावि गर्नुभयो ।
उपाध्यक्ष हरिप्रसाद पाठकले पालिकाको समग्र विकासका साथै गुणस्तरीय सेवा प्रवाहमा ध्यान दिने बताउनु भयो । कार्यक्रममा प्रमुख प्रशासकीय अधिकृत बद्रिनाथ लम्सालले यो वर्ष पालिकाले गरेका कामको प्रतिवेदन प्रस्तुत गर्दै यो वर्ष २६० वटा योजना सम्झौता भइ काम भएको उल्लेख गर्नुभयो । यो अवधिमा ६० बढी योजना सम्पन्न भएको बताउदै पुजीगत तर्फ १४.४३ र चालू तर्फ ३९.९७ प्रतिशत काम सम्पन्न भएको जानकारी गराउनु भएको थियो ।
कार्यक्रममा गाउँपालिकाका प्रवक्ता टीकाबहादुर थापाले सेवाग्राहीले दिएको सुझावलाइ ग्रहण गरेर अघि बढ्ने बताउनु भयो । सार्वजनिक सुनुवाई कार्यक्रमको नागरिक अभिमत र बहिर्गमनको प्रतिवेदन बगनासकाली पत्रकार समूहका सचिव दयाराज न्यौपानेले प्रस्तुत गर्नु भएको थियो । जनप्रतिनिधि, कमर्चारी, सेवाग्रही, पत्रकार तथा नागरिक समाजका प्रतिनिधिहरूको सहभागीता रहेको सार्वजनिक सुनुवाईको सहजीकरण बगनासकाली पत्रकार समूहका अध्यक्ष भोजराज तिमिल्सिना र उपाध्यक्ष नेत्र गैरेले सहजीकरण गर्नु भएको थियो ।
